“Fəxr edirəm ki, mən azərbaycanlıyam”

Heydər Əliyev
10.11.2020, 19:00
15

İtaliyada və İordaniyada Azərbaycanın Dövlət Bayrağı Günü qeyd olunub

A- A+

“The Fontana della Dea Roma” meydanında azərbaycanlı gənclər italiyalı musiqiçilərin müşayiəti ilə “Ay Laçın” mahnısını ifa ediblər

 

İtaliya-Azərbaycan Birliyinin təşəbbüsü ilə 9 Noyabr – Dövlət Bayraq Günü münasibətilə İtaliyanın Roma və Piza şəhərlərində tədbir keçirilib.

İtaliyada təhsil alan azərbaycanlı gənclərin iştirakı ilə təşkil olunan tədbirlərdə Azərbaycan dövlətinin suverenliyinin rəmzi olan üçrəngli bayrağın ölkəmizin işğal olunmuş torpaqlarında yenidən dalğalanmasının dünyada soydaşlarımıza fərəh hissi bəxş etdiyi vurğulanıb.

Roma şəhərində “The Fontana della Dea Roma” meydanında italiyalı musiqiçilərin müşayiəti ilə “Ay Laçın” mahnısını ifa edən gənclər şəhər sakinlərinin diqqətini çəkiblər.

Tədbir iştirakçıları işğalçı Ermənistan ordusunun hərbi təxribatlarına, Azərbaycanın dinc əhalisini atəşə tutmasına, mülki obyektlərin dağıdılmasına dair məlumatverici lövhələr, plakatlar vasitəsilə Qarabağ həqiqətlərini İtaliya cəmiyyətinin diqqətinə çatdırmağa çalışıblar.

***

İordaniyadakı Azərbaycan diasporunun nümayəndələri, COVID-19-la bağlı mövcud qaydalara riayət etməklə, Azərbaycan Respublikasının Dövlət Bayrağı günü və Şuşa şəhərinin işğaldan azad olunması münasibətilə tədbir keçiriblər.

Tədbir Əmmanın Bədr rayonunda ümummilli lider Heydər Əliyevin adını daşıyan meydanda keçirilib. Soydaşlarımız öncə ümumillli lider Heydər Əliyevin və Azərbaycanın ərazi bütövlüyü uğrunda canından keçən şəhidlərimizin əziz xatirələrini yad edib, ruhuna dualar oxuyub.

Hər kəs qürurla üçrəngli bayrağımızı dalğalandıraraq Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə qüdrətli ordumuzun əldə etdiyi tarixi qələbələri sevinclə qeyd edib və ədalətli mübarizəsində Azərbaycanı dəstəklədiklərini bildiriblər.

Daha sonra tədbir iştirakçıları Azərbaycan bayrağının rəngləri ilə işıqlandırlan “Le Royal” hotelinin qarşısına toplaşıblar.

Qeyd edək ki, Azərbaycan Respublikasının Dövlət Bayrağı günü münasibətilə “Le Royal” hotelinin binası bayrağın rənglərində işıqlandırılıb.

Xəbərlər
Redaktorun seçimi