ATƏT-in Minsk Qrupunun həmsədrləri Yuri Merzlyakov (Rusiya), Bernar Fasie (Fransa) və Metyu Brayza (ABŞ) Azərbaycan və Ermənistan prezidentlərinin Praqa görüşündən sonra birgə bəyanat yayıblar. 

APA-nın ATƏT-in rəsmi saytına istinadən yaydığı məlumata görə, bəyanatda mayın 7-də, ATƏT-in Minsk Qrupunun həmsədrlərinin xarici işlər nazirləri ilə birlikdə ABŞ-ın Praqadakı səfirliyində Azərbaycan və Ermənistan prezidentlərinin görüşünü təşkil etdiyi bildirilir: “Bu, bir ildən də az müddət ərzində prezidentlərin dördüncü görüşüdür. 

Həmsədrlər hesab edir ki görüşlərin hər biri tərəfləri irəliləyişə yaxınlaşdırır. Bu mənada mayın 7-də keçirilmiş görüş mühüm irəliləyişin olduğunu göstərir. Prezidentlər həmsədrlərin irəliləyiş üçün vacib olan elementlərin toplanması ilə bağlı məkik diplomatiyasını gücləndirmək planını alqışlayır.

Həmsədrlər regiona növbəti səfərlərini və prezidentlərə iyunda Sankt-Peterbuqrda keçirilməsi təklif olunan növbəti sammiti səbirsizliklə gözləyirlər. Həmsədrlər hesab edir ki, qarşıdakı görüşlər ilin sonunadək təməl prinsipləri ilə bağlı konkret irəliləyiş əldə etməyə imkan verəcək”.

APA, 08.05.2009.

ABŞ-a səfəri çərçivəsində Rusiyanın xarici işlər naziri Serqey Lavrov Karnegi Fondunda Rusiya ilə məşğul olan amerikalı ekspertlərlə görüşüb. Görüşdə APA-nın müxbirinin sualını cavablandıran S. Lavrov Minsk Qrupu həmsədrlərinin Azərbaycan və Ermənistan prezidentlərinin Praqa görüşünə dair yaydığı bəyanata münasibət bildirib.

Lavrov deyib ki, Dağlıq Qarabağ münaqişəsinin baza prinsipləri 2007-ci ilin payızında Madriddə tərəflərə təqdim olunub, həmin prinsiplər bu gün də müzakirə masasındadır: “Hər iki tərəf bəziləri istisna olmaqla, qalan prinsipləri qəbul edib. Aparılan sonuncu danışıqların məqsədi qeyd etdiyim məqamlar üzrə son razılıq etməkdən ibarətdir. Tərəflərin konkret hansı məqamlar üzrə razılıq əldə etməsi barədə hesabatı mən hələ almamışam. Lakın ötən ilin noyabrında Moskvada, indi isə Praqada əldə olunan razılıqlar ümidvericidir”.

Azərbaycan və Ermənistan prezidentlərinin bu ilin iyununda Sankt-Peterburqda keçiriləcək iqtisadi foruma qatılmağa razılıq verdiyini qeyd edən S. Lavrov forum çərçivəsində daha bır görüşün təşkilinə imkan yaranacağını söyləyib: “Əldə olunan son razılaşmalar ümidverici olsa da, bu, vaxt tələb edən prosesdir. Prezidentlərin müzakirə etdiyi məsələlərin detallarını açıqlamaq olmaz. Lakın ümumiyyətlə biz Azərbaycan və Ermənistanın razılıq əldə etmək ehtimalına nikbin baxırıq”.

S. Lavrov görüşdə onu da bildirib ki, Rusiya Dağlıq Qarabağ münaqişəsində ikili standartlara yol vermir, münaqişəyə cəlb olunan tərəflərə öz mövqeyini diktə etmir.

APA, 08.05.2009.

Azərbaycan və Ermənistan prezidentlərinin Praqa görüşü çətin şəraitdə keçib

Azərbaycan və Ermənistan prezidentlərinin Praqa görüşü çətin şəraitdə keçib. APA-nın diplomatik mənbələrə istinadən verdiyi məlumata görə, görüşdə Ermənistan özünün qeyri-konstruktiv mövqeyini təkrar nümayiş etdirib.

Belə ki, yenidən iki il əvvəl danışıqlarda təklif etdiyi formulu müzakirəyə çıxarmaq istəyən Ermənistanın daha sərt tərzi nəzərə çarpıb.

Diplomatik mənbələr Ermənistanın bu mövqeyini daha çox Türkiyə ilə Ermənistan arasında imzalanmış “Yol xəritəsi”nə bağlayıblar. Ermənistanın məhz bu sənədin qəbulundan sonra mövqeyini sərtləşdirdiyi xüsusilə diqqət çəkir. Bu mövqe isə ümumilikdə danışıqlar prosesinə mənfi təsir göstərir.

Qeyd edək ki, eyni məzmunlu informasiyanı Azərbaycanın ANS televiziyası da öz mənbələrinə istinadən yayıb.

APA, 07.05.2009.