Azərbaycanda neft hasilatının pik dövrünün 2012-ci ildə müşahidə olunacağı gözlənilir.

 «APA-ECONOMICS»in məlumatına görə, bunu Avropa Yenidənqurma və İnkişaf Bankının (AYİB) region üzrə böyük iqtisadçısı xanım Tanita Taci bildirib.

Onun sözlərinə görə, Azərbaycanda neft hasilatının artırılması üçün potensial mövcuddur:

«Azərbaycanda neft hasilatının pik dövrünün 2012-ci ildə müşahidə olunacağı, daha sonra isə azalacağı gözlənilir. Bu da nəticədə ÜDM-ə mənfi təsir göstərəcək. Məhz buna görə, Azərbaycan qeyri-neft sektorunun inkişafına ciddi diqqət yetirməlidir».

Qeyd edək ki, 2009-cu il ərzində Azərbaycanın neft hasilatı rekord həddə çataraq 50,4 mln. ton təşkil edib

 * * *

2009-cu ildə Dövlət Neft Fonduna 8,2 mlrd. manat daxil olub, 5,3 mlrd. manat xərclənib

Yanvarın 26-da “Hyatt Park” mehmanxanasında Dövlət Neft Fondunun icraçı direktoru Şahmar Mövsümov 2009-cu ilin yekunları ilə bağlı mətbuat konfransı keçirmişdir.

Azərbaycan iqtisadiyyatının son illər sürətlə inkişaf etdiyini diqqətə çatdıran Ş.Mövsümov dünyanı bürümüş maliyyə-iqtisadi böhrana baxmayaraq, keçən ilin də ölkəmiz üçün uğurlu olduğunu bildirmiş, Neft Fondunun 2009-cu ildə gəlir və xərcləri barədə hesabatını açıqlamışdır.

Bildirmişdir ki, ötən il qurumun büdcə gəlirləri 8 milyard 176,7 milyon manat, büdcə xərcləri isə 5 milyard 294,5 milyon manat təşkil etmişdir.

Fondun 2009-cu il büdcəsinin gəlir hissəsi 97,8 faiz, xərc hissəsi isə 99,5 faiz yerinə yetirilmişdir. Ötən il Dövlət Neft Fondunun vəsaitlərinin idarə olunmasından əldə edilən gəlir 305,9 milyon manat olmuşdur.

AzərTAc